Dje në mesditë, Ramazan Bruli, 26 vjeç, është gjetur i pajetë në fshatin Barbullush nga kalimtarët në një kanal kullues. Trupi i të riut u dërgua në Morgun e Spitalit Rajonal Shkodër, ndërsa nga këqyrja paraprake mjeko-ligjore, në trupin e tij nuk janë konstatuar shenja dhunë.
“Nga këqyrja paraprake mjeko-ligjore, në trupin e viktimës nuk konstatohen shenja dhune apo të ndonjë faktori tjetër të jashtëm. Nga deklarimet e marra, rezulton se viktima nuk ka pasur konflikte të hapura me persona të tjerë, por kishte probleme mendore dhe ishte përdorues alkooli, ku dhe dyshohet se shkak i vdekjes është mbytja në ujë”, deklaron Policia.
Do të jetë ekspertiza e plotë mjeko-ligjore, që do të përcaktojë shkakun e vërtetë të vdekjes së 26-vjeçarit, ndërkohë që Policia po bashkëpunon me Prokurorinë për sqarimin e rrethanave të ngjarjes.