Për Florenc Beqirajn, është konfirmuar se do të kryhet autopsia edhe në një njoftim të Ministrisë së Brendshme franceze. Autoritetet franceze nuk nxitohen të japin detaje për shkaqet e vdekjes së 22 vjeçarit, por thonë se: Më 14 dhjetor 2017, rreth orës 17.30, shtetasi Florenc Beqiraj u gjet i pandërgjegjshëm në dhomën e tij në Qendrën e Ndalimit Administrative në Marsejë, pasi ishte shoqëruar më parë atje pas vendimit administrativ të Prefekturës për largim nga territori francez.
Zotit Florenc Beqiraj iu dha menjëherë përkujdesja e urgjencës dhe ai u transportua në qendrën spitalore të Marseille-Nord. Prokuroria e Marsejës u njoftua të njëjtën ditë për ngjarjen dhe një hetim mbi ngjarjen ka nisur menjëherë. Pas disa ditësh në koma të thellë, në datën 21 dhjetor, ora 18.30, u konstatua vdekja e z. Florenc Beqiraj. Trupi i tij u transportua në pavionin e mjekësisë ligjore të Marsejës më 23 dhjetor, konform udhëzimeve të Prokurorisë e cila kërkoi të kryhej autopsia. Autopsia do të kryhet në ditët e ardhshme, ndërkohë që hetimi vazhdon.
Siç duket nga deklarata, autoritetet franceze janë të rezervuara të shprehen nëse Florenci u gjet i vrarë apo i vetëvrarë. Pritet përfundimi i hetimeve për të hedhur dritë mbi ngjarjen.