Grabitja e ndodhur sot në Hipotekën e Tiranës mbetet ende e paqartë. Nga njëra anë policia thotë që u grabit filiali i Postës Shqiptare brenda këtij institucioni. Nga ana tjetër Posta Shqiptare ka reaguar përmes një deklarate, ku sqaron se nuk është grabitur filiali i saj, por zyrat e një banke të nivelit të dytë. Më poshtë deklaratë e postës për ngjarjen.
“Posta Shqiptare Sh.A, u njoh me lajmin e publikuar në disa media, në të cilin pretendohej “Grabitja e Zyrës Postare të atashuar në ambientet e Hipotekës, Tiranë”, për të cilin sqarojmë dhe saktësojmë: Posta Shqiptare Sh.A u informua në lidhje me një grabitje që ka ndodhur në një Bankë të Nivelit të Dytë, në ambientet e sporteleve të zyrave të pritjes të Hipotekës, Tiranë. Sipas informacioneve të marra nga organet kompetente, Sigurimi Postar dhe Policia e Shtetit, fatmirësisht rezulton se nuk ka patur dëmtime fizike në njerëz, dhe saktëson se kjo grabitje nuk ka ndodhur në Zyrën e Shërbimit Postar që operon në ambientet e brendshme të Hipotekës. Duke shprehur keqardhje për këtë ngjarje, Posta Shqiptare dëshiron të informoj dhe të sigurojë të gjithë qytetarët që shërbimi nëpër sportelet e Postës Shqiptare vazhdon normalisht, duke garantuar siguri dhe cilësi maksimale”, thuhet në njoftimin e Postës.
©LAPSI.al
Hipoteka u vidhka dhe nga jashte,i lumte kryetarit qe te pakten nuk e vodhen nga brenda.