Një 25-vjeçar u arrestua ditën e sotme në Tiranë, pasi ishte shpallur në kërkim ndërkombëtar nga Shtetet e Bashkuara të Amerikës, për krime në fushën kibernetike.
25-vjeçari lindur dhe banues në Fier, Aldo Ymeraj, bënte pjesë në organizatën kriminale kibernetike “Infraud”, e cila është përgjegjëse për 530 milion dollarë dëme.
Kjo organizatë shiste të dhëna të vjedhura kartash krediti në thellësi të internetit, duke u shkaktuar konsumatorëve humbje të mëdha.
Nga 36 personat ndaj të cilëve u ngrit padi, 13 janë arrestuar në Shtetet e Bashkuara, Australi, Britani, Francë, Itali, Kosovë dhe Serbi.
Grupi i quajtur “Infraud”, ishte krijuar në vitin 2010 nga Svyatoslav Bondarenko, një 34-vjeçar ukrainas dhe përdorte një forum në internet për të blerë dhe shitur karta krediti dhe llogari bankare të vjedhura, numra të sigurimeve shoqërore dhe informacione të tjera personale.
©LAPSI.AL