Evropa ka parë rritje masive të rasteve të fruthit në vitin 2017.
Organizata Botërore e Shëndetësisë tha se bëhet fjalë për 400% rritje, përkatësisht për mbi 20,000 njerëz të infektuar, krahasuar me 5,273 në vitin 2016. Nga të infektuarit, 35 kanë vdekur.
Sipas OBSH-së, shifrat janë tragjedi.
Pesëmbëdhjetë rajone evropiane kanë pasur shpërthime të mëdha, në mesin e tyre: Rumania, Italia dhe Ukraina.
Njerëzit që shmangin vaksinimin janë pjesë e problemit, thonë ekspertët.
“Çdo person i prekur nga fruthi në Evropë na kujton se fëmijët dhe të rriturit e pavaksinuar, pavarësisht se ku jetojnë, janë në rrezik nga sëmundja dhe përhapja e saj te të tjerët”, tha Suzsanna Jakab, nga Organizata Botërore e Shëndetësisë.
Fruthi është një sëmundje virale infektive që mund të jetë vdekjeprurëse.