Gjykata e Krimeve të Rënda e la në arrest shtëpie, ndërsa ish-Ministri i Brendshëm Saimir Tahiri nuk e humbi qetësinë gjatë kontaktit me kamerat që e prisnin jashtë duke u shfaqur i buzëqeshur.
Tahiri u shoqërua në shtëpinë e tij tek “Kodra e Diellit” me makinën e policisë, me të cilën edhe erdhi. Gjatë largimit, jashtë gjykatës pati edhe mbështetës të tij që nuk nguruan ta përshëndesnin nga xhami i makinës.
Gjykata e Krimeve të Rënda lë në fuqi masën e sigurisë “arrest shtëpie” të dhënë tre ditë më parë për ish-Ministrin e Brendshëm Saimir Tahiri. Në seancën dy orëshe, ish-Ministri dhe avokati i tij Maks Haxhia nuk arritën të bindin gjyqtaren Liliana Baku për vendosjen e një mase më të lehtë sigurie.
Përballë tyre, dy prokurorët e çështjes Vladimir Mara dhe Besim Hajdarmataj thanë se kjo masë sigurie është e domosdoshme pasi rrezikon prishja e provave. Seanca u zhvillua pa praninë e kamerave.
Pas vendimit avokati Maks Haxhia shprehu bindjen se ky vendim do të prishet nga Gjykata e Apelit ku do të ankimojnë, pasi sipas tij pretendimet e mbrojtjes janë të argumentuara në ligj.