Duket se suksesi i hitit veror “Bow Down” është pasuar me një konflikt autorësie mes Noizyt dhe Enca Haxhisë, të cilët prej vitesh ruanin një miqësi të veçantë. Pas kapjes së shifrës 30 milionë klikime në YouTube, ishte 20-vjeçarja Enca Haxhia ajo e cila shprehu e para entuziazmin për suksesin, duke shkruar në Instagram: “Jam kaq e lumtur që shoh se si një këngë që unë e kam shkruar me kaq dashuri dhe pasion, sapo ka arritur 30 milionë”, duke deklaruar kështu se ajo është autore e saj.
Por menjëherë pas këtij postimi, erdhi reagimi i Noizyt, i cili duke korrigjuar Encën tha se ishte ai krijuesi i hitit: “30 milionë, sa për të të korrigjuar Enca Haxhia. Është diçka që unë e kam krijuar, në rast se harrove. Dhe po, je e falur. Paqe”. Pak kohë më pas, të dy i fshinë këto postime aspak të këndshme nga faqja e tyre në “Instagram”, ndërsa Enca vijoi me disa postime të tjera në “Snapchat”, si: “Unë dhe ai ishim të pandarë…”. Nuk dihet nëse dyshja e kanë lënë pas sherrin publik, por me siguri pas këtij episodi, gjërat nuk do të jenë si më parë.