• |
ide | kryesore

A ishte “e shitur” ndeshja Tirana – Kukësi?

Arkiva, Sport
sjfgkdjfg.jpg

Fitorja e (pa)pritur e Kukësit në Tiranë ka ngritur një valë reagimesh. Trajneri Ernest Gjoka bëri pak ditë më parë një deklaratë të “të pafajshme” duke pranuar se “marrëveshje ka edhe në politikë, përse nuk duhet të ketë në sport”. Kjo nënkuptonte fitoren e Kukësit në kampionat duke qenë se verilindorët janë pretendentë në këtë kompeticion dhe Tirana fitonte përballjen në Kupën e Shqipërisë. Një ditë më pas klubi kuksian e mohoi deklaratën dhe tha se fjalët ishin keqkuptuar. Megjithatë dyshimet mbetën. Kjo i detyroi menjëherë kompanitë e basteve ta bllokojnë kuotimin e kësaj ndeshjeje. Lapsi.al pyeti në njërën prej kompanive për arsyet e bllokimit dhe përgjigjja ishte se “kishte dyshime të forta që ndeshja do të tolerohej në favor të Kukësit”.


Çfarë ndodhi në ndeshje


Pjesa e parë ndisi vrrullshëm, me sulme nga të dy krahët. Më të qartë dukeshin lojtarët e Tiranës që ndërtuan shumë aksione të rrezikshme të cilat u finalizuan me me një gol të Takut. 45 minutat e para u mbyllën 1-0 me avantazhin e kryeqytetasve. Në pjesën e dytë ndryshoi gjithçka “si me dorë”. Lojtarët e Tiranës e humbën shkëlqimin dhe nisën të vraponin më pak në fushë. Të tërhequr në gjysmëfushën e tyre lejuan shumë hapësira për sulmuesit e Kukësit Pejiç dhe Emini të cilët gjetën portën me dy gola duke përmbysur rezultatin. Pritjet e portierit Lika bënë që rezultati të mos ishte më i thellë.

Ai ishte e trukuar?   

Gazeta “Panorama Sport” bën një akuzë të qartë. Sipas saj kjo ndeshje nuk mund të flitet për futboll, por për “teatër skandaloz”.

“Pjesa e dytë është diçka krejtësisht ndryshe, që ka pak të bëjë me futbollin e një kampionati që cilësohet “rivalizues” si rrallëherë. Tirana duket një skuadër tjetër dhe të njëjtët mbrojtës që linin pak hapësira për Pejiç dhe Eminin, tani thjesht shoqërojnë me sy sulmuesit kundërshtarë, duke u dhuruar hapësira që rrallëherë i kanë gjetur në vitet e fundit në Superiore.

Ndaj shfaqja e turpshme në “Selman Stërmasi” vazhdon me golat e Pejiç dhe Eminit që përmbysin rezultatin dhe i japin tre pikët Kukësit, që vazhdon i qetë në kryesimin e kampionatit, pas një teatri skandaloz që u dhurua në kryeqytet”.

Flasin dy trajnerët

Trajneri i Tiranës, Mirel Josa, e ka cilësuar një ndeshje me “futboll të luajtur drejt” atë ndaj Kukësit. Në fjalët e tij në “Gol pas Goli”, tekniku i bardhebluve u mundua të shpjegonte çfarë kishte ndodhur ndaj verilindorëve, duke i vënë fajin mesfushorëve të qendrës.

“Ne sot luanim me ekipin kryesues të kampionatit, normalisht që ekipi i Kukësit vinte me më tepër presion për të fituar ndeshjen. Ne e luajtëm dhe besoj se luajtëm drejt futbollin për mënyrën e lojës brenda në fushë, për atë që mua më takon të them për sa i përket mënyrës se si ne e kërkuam lojën që në fillim të saj. Pastaj me kalimin e minutave dhe shtimin e presionit nga Kukësi, kemi qenë edhe herë të tjera në këto pozita me skuadra të tjera dhe kemi pasur probleme kur donim të shënonim medoemos” – tha Josa.

Ndërsa trajneri i Kukësit, Ernest Gjoka ka evituar të flasë për ndeshjen.

“Nuk merrem me ato llafe, çdo njeri ka punën e vet të flasë e të mendojë si do vetë. Më vjen keq që e mendoni, por nuk dua të bëj më replika. Mendoj se nuk është e vërtetë, nuk e di ku mbështeteni që flitni. Nuk i përgjigjem pyetjes që më duket jashtë normales”, – tha ai, i pyetur nga paneli në studion e Supersport. “A ka aleancë? Më vjen keq që e mendoni ashtu se nuk e kam mbledhur ende veten. Isha i shqetësuar se për pak do të më iknin tri pikë dhe nuk do t’i gjeja më”, deklaroi Gjoka./lapsi.al/

Kthehu