• |
ide | kryesore

Dikur vije në kishë, tani je ushtar i “të fortëve” me X6

Arkiva, Blog
dom-Gjergji-411x500.jpg



Nga Dom Gjergj Meta                                

I dashur A,

Kam qenë edhe famullitar në zonën tënde, për pak kohë, të themi rreth 2 vjet, aty diku përreth fshatrave të Fushë­-Krujës, që këto ditë u përfol për kultivim lëndësh narkotike. Më njeh edhe ti se jemi takuar shpeshherë apo më ke parë në rrugët e fshatit tënd, apo duke pirë ndonjë kafe me njerëzit aty. Ti nuk ke për ta lexuar këtë letër për shumë arsye. E para, sepse ne “elita” letrat i shkruajmë për njëri– tjetrin se ashtu janë ca “muhabete”: ne i flasim vajzës që të dëgjojë nusja.

Por edhe sepse ti ndoshta sot je roje në ndonjë parcelë të mbjellë me kanabis me kallash në krah, ose po qëron bimët në ndonjë magazinë, ose po mban thasët e po i transporton, ose thjesht je në burg, sepse

kësaj here të kanë kapur. Unë të njoh mirë dhe e di kush je, çfarë mendon, si arsyeton, si je rritur dhe çfarë ke dëgjuar qysh fëmijë. Ti je një i ri i pas viteve ‘90. Në këto vite ti nuk je rritur me propagandën komuniste, ti nuk ke dëgjuar për xhaxhi Enverin e as për arritjet e mëdha të Partisë dhe të pushtetit popullor. Ti nuk ke parë luftën e klasave as nuk e ke ndier fare atë.

Ti nuk ke bërë betimin si pionier i Enverit, ti nuk ke qenë debatikas dhe as nuk ke mbajtur shallin e kuq. Shumë gjëra kësisoj ti nuk i ke bërë dhe për këtë je me fat. Por ama, nga ana tjetër, ty të është servirur vazhdimisht si model ai i forti, me makina luksoze që e ka blerë pak kohë pasi iku në Itali. Ti je rritur me modelin e të fortëve të Kurbinit dhe Fushë­Krujës që kanë trafikuar femra, janë marrë me

drogë, me vrasje etj. Po! Ky ka qenë modeli yt.

Ti je rritur me fjalë të tipit: “Hallall ia boftë Zoti atij!”, “Ai osht njish or ti”; “Ai ka pas gjith ato k..va në Milano or plak”, “Ho er burr ne ti se drog ka lujt se s’i ka bo dom kujt”, “Osht i zoti nuk matesh dot me te se t’heq qafe”. Madje kur i ke parë këta tipa që zbrisnin nga makinat e tyre luksoze, në lokalet e zonës, të blera në pak kohë, që sapo dilnin nga makina i fusnin një të shfryrë hundëve dhe një të pështyrë në tokë e përshëndesnin: “he or zjarm ça ke bo?” ti “eksitoheshe” krejt

dhe ëndërroje të ishe si ai.

Ndërkohë ty qysh të vogël nuk të ka thënë kush që numrat e matematikës janë hyjnorë dhe se shkenca është e bukur; sa e bukur është gjeometria dhe algjebra; se germat e shqipes janë të bukura e që Eposi i Kreshnikëve, poezitë e Fishtës e të Naimit, sonetat e Mjedës dhe përkthimet e Nolit janë një ushqim për shpirtin. Nuk të ka thënë kush me ngulm se të lexosh Hygoin, Dostojevskin, Servantesin e Floberin, Shekspirin e Dikensin, njeh shpirtin krijues të kontinentit të vjetër. Po ashtu, nuk të kanë vënë në dorë kurrë një dialog të Platonit, një copëz nga etika e Nikomakut të Aristotelit, apo thjesht një faqe të Kantit, Hegelit, Nices a ku ta di unë. Madje, edhe emrat e tyre mund të duken të çuditshëm.

Ti je rritur me tallavanë dhe me reperat dylekësh dhe as të ka shkuar ndërmend se ka një Bach, një Mozart, një Bethoven e kështu me radhë. Sa shumë do të kishte ndryshuar jeta jote po të kishe njohur në vend të të fortëve të Laçit, Tropojës, Tepelenës, Vlorës, Fierit, Durrësit, së paku një nga këto emra që të thashë më sipër. Më beso se jeta jote do të kishte qenë krejt ndryshe. Ti këto nuk i pate e as prindërit tuaj nuk i patën, duke qenë se në këto vite ata më shumë mundoheshin se si të siguronin bukën për ty dhe vëllezërit e motrat e tu.

Ata të lanë punën, por ti nuk e doje as punën, sepse e pe që yt atë dhe nëna jote me punë, çdo ditë në arat e tyre, nuk arrinin të siguronin as bukën e gojës. Ti e vure re se prindërit tuaj në këto vite, megjithëse punuan çdo ditë tokën, ruajtën lopët, apo punuan roje në ndonjë biznes privat, në fund nuk patën lekët e mjaftueshme kur gjyshja u sëmur rëndë, apo ku mami pati një tumor në gjoks. Ti e pe se ata që mbaruan shkollën nga fshati apo lagjja jote filluan punë në një “call center” dhe i rrofshin klasikët e letërsisë, shkencat ekzakte etj.

Ndërkohë që ti shihje para teje parakalime “tangarllëku” nga moshatarët e tu, apo edhe pak më të mëdhenj me Kabriolet, Cayenne e pastaj edhe më banale si X6 apo Ferrari. E tani më vjen ndërmend kur ti fëmijë vije te Kisha bashkë me fëmijët e tjerë e luaje me ta, luteshe me ta, gëzoheshe bashkë me të gjithë moshatarët e tu. Por çfarë ndodhi? Pse tani je aty pas hekurave, apo në vetminë e një are të mbjellë me lëndë narkotike të jashtëligjshme, apo brenda një magazine ku pastron kanabis? Pse? Ja ku po ta them se sot je thjesht një ushtar, një ushtar i vogël i papërfillshëm, i cili ka humbur lirinë e

vet dhe rininë e vet.

Të kanë premtuar “të fortët” se po të bëje këtë punë fiton shumë, në pak kohë dhe je i sigurt, sepse “policia na mbron”. Jo i dashur, nuk ka një polici që mbron të keqen. Policia nuk mbron krimin, ajo herët a vonë do ta luftojë atë. Edhe policët janë prindër të disa të rinjve të moshës tënde dhe thjesht duan të marrin rrogën e tyre. Ka kriminelë në radhët e saj, mund të ketë drejtues të korruptuar, por jo policia. Do të vijë momenti që një ditë do të hyjnë në magazinën ku je ti, me kapuça, të armatosur deri në dhëmbë, e do të bërtasin: “ndal, duart lart!,” do të kapin e do të shtrijnë përtokë duke të vënë një tytë të ftohtë pistolete në kokë e do të vënë prangat. Dhe ti si ushtar që je do të dënohesh, por “shefat” e tu jo. Ata do të vazhdojnë duke rekrutuar të tjerë të rinj si ti, duke filluar nga e para me premtimet e tyre e do t’i shohësh atje te ti në burg. E megjithatë të shkoi mirë që je në burg se mund të ishe edhe një kufomë më shumë dhe anonime në parcelat e kanabisit.

Por unë do të vij edhe atje të takoj në burg, jo për të thënë se je djalë i keq, por për të thënë se me gjithë të gjitha, nëse ti do, në fund të tunelit ka gjithmonë dritë dhe se mund t’ia dalësh, por për këtë duhet të dalësh nga terri ku je futur, duhet të dalësh mbi vetveten. Për këtë duhet të kesh guxim e unë jam këtu për të t’inkurajuar që të ikësh nga parcelat apo magazinat e kanabisit e të nisësh një jetë të re…



4 Comments

  1. Komplimente Dom Gjergj

    Komplimente Dom Gjergj. Nje pergjigje brilante ndaj modelit te te riut udhehumbur qe prej ca kohesh po promovohet nga klanet okulte te trekendeshit media-politike-krim.                             Une qe po shkruaj jam nje prind adoleshentesh i shqetesuar per ndotjen morale te mjedisit shoqeror ( sidomos ne zonen e rastit ne fjale ). Ne njihem edhe bashke por nuk po prezantohem sepse mendoj se me kete qendrim timin nuk perfaqesoj vetem veten dhe familjen time por edhe te tjere prinder dhe familje qe luftojne cdo dite te ndertojne nje te ardhme te sigurt dhe te drejte. D.M.

     

  2. Shoqeria shqiptare dhe

    Shoqeria shqiptare dhe sidomos familja kane humbur busullen dhe kane leshuar freret e nuk po dine te rimarin situaten ne kontroll. Nuk mund te kete kurre prespektive nje vend ku adoleshnte  dhe te rinj te pashprese jane dhene pas parase pa djerese,pas jetes se qefit pa kontribuar, pas kurverimit pa fre sikur ne jete te mos kete as qellim e as alternative tjeter. Nje shoqeri qe percudnon vlerat qe ruajne kohezionin dhe normat elementare te bashkjeteses qytetare e qe shet per vlera narkomanine,shthurjen morale,injorancen dhe dhunen mbi ne te dobtin eshte e denstinuar te vdese.Duhet qe urgjentisht familja,shteti dhe institucionet fetare te ngrihem mbi apatine dhe pergjumjen e thelle e te ndalin zvetnimin shoqeror dhe shpirteror qe na ka kapluar. Si eshte rinia sot do jete Atdheu neser. ….

  3. shume e drejte dhe ske cfare

    shume e drejte dhe ske cfare ti shtosh me .drama shqiptare e nje populli qe humbi identitetin …vazhdon .  …. 

  4. Ungjilli

    Nje artikull sic e prisja nga pena juaj Dom Gjergj. Ama ne fund mungon shpresa e vertete qe ky djale te dale prej ketij cikli veteshkaterrues, edhe ai eshte Ungjilli, lajmi i gezuar rreth ardhjes se Zotit Jezu Krisht ketu ne toke per t'u trupezuar si njeri, per te jetuar nje jete te pamekat dhe per te permbushur Ligjin e shenjte te Perendise, te cilin as une dhe as ju i nderuar nuk e permbushnim dot, Vdekjes se Zotit Jezu Krisht ne kryq per ne te pafete dhe mekataret, Ngjalljes se Tij se vdekuri ne te treten dite, dhe Kthimit te Tij te Lavdishem, te cilin po e presim qe te gjithe ne besimtaret. E them kete Dom Gjergji, sepse cdo dite po behet gjithnje e me e qarte se nuk ka shpetim tjeter per kete rini te cartur, per kete popull te coroditur e pa bari, te lodhur e te drobitur prej kesaj shtazerie ku jetojme te gjithe edhe qe njihet ndryshe si shoqeria shqiptare. E them kete sepse besoj fuqimisht qe Ungjilli eshte fuqia e Perendise edhe per shpetimin e A-ve po djemve te tjere te vegjel qe kane humbur rrugen neper labirintet e krimit, hashashit e pislleqeve te tjera si keto. E them kete sepse abisi eshte afer dhe nuk ka me kohe per lalje e lule, ka ardhur koha qe kjo shtazeri te vihet nen gjykimin e Ligjit te Perendise, me qellim qe ky te kthehet ne udherrefyesin qe do ta coje tek Ungjilli, me qellim qe te pendohet per mekatet e veta dhe ta vendose besimin e saj tek i Lumi Shpetimtar dhe jo tek politiqenet, te fortet, dhe legenat e tjere te tranzicionit. Kupa u mbush, pilafi nuk mban me uje dhe Kisha e Zotit duhet te marre rolin e saj udheheqes ne luften frymerore kunder tiranise se shtazerise ku gjendemi tashme. Askush tjeter nuk e permbush dot kete mision te shenjte, sepse te gjitha gjerat qe ka shpikur njeriu, qofshin keto parti politike, OJQ e me the e te thashe nuk jane vecse nje imitim i zbehte i Kishes se Lavdishme te te Lumit Shpetimtar.