Vajza rumune që ra në lumin Tamiz gjatë atentatit terrorist të muajit të kaluar në Londër është ndarë nga jeta.
Andreea Cristea ishte shtruar në spital që ditën e sulmit, më 22 Mars. Me vdekjen e 31-vjeçares, numri i të vdekurve nga ai sulm shkoi 5.
Cristea ishte arkitekte dhe kishte shkuar në Londër sëbashku me të fejuarin e saj Andre Burnaz. Mësohet se Burnaz kishte në plan që ditën e sulmit t’i propozonte rumunes për martesë.
Familja e Andreea Cristea njoftoi vdekjen e saj, që ndodhi të enjten në mbrëmje.
“Pasi luftoi me vdekjen për dy javë rresht, shumë e dashura dhe e pazëvendësueshmja jonë Andreea u rrëmbye nga jeta e saj në mënyrën më mizore, më brutale e më të pashpirt”- deklaruan familjarët e 31-vjeçares.
Pas familjes reagoi edhe Kryetari i Bashkisë së Londrës, Sadiq Khan, i cili tha se ndihej “thellësisht i keqardhur”, kur mori vesh për vdekjen e Andreea Cristeas.
22 Marsi ishte një ditë e përgjakshme për kryeqytetin britanik, Londrën. Atentatori Khalid Masood iu drejtua një turme njerëzish me makinën e tij, duke shtypur 3 prej tyre, para se të qëllohej për vdekie nga policia.
Gjatë sulmit gjeti vdekjen edhe një polic, i cili u sulmua me thikë nga Masood. /LAPSI.AL/
