• |
ide | kryesore

Loja e dyfishtë e Ramës me Elbasanin dhe Lushnjen

Arkiva, Kryesore, Lajme

Kryeministri Edi Rama gjeti sot kohën për të reaguar lidhur me ndërtimin e paligjshëm që biznesmeni Harri Lena po bënte në Vjosë në Grykën e Këlcyrës


“Shkarkimet në polici për krimin mbi Vjosë duhet të jenë vetëm fillimi dhe duhet të bëhen normë për çdo krim mjedisor”, shkruajti Rama në Facebook.


Reagimi i tij erdhi fill pasi u njoftua shkarkimi i shefit të komisariatit të Përmetit, shefit të stacionit policor në Këlcyrë dhe përjashtimi i inspektorit të zonës, të cilët nuk kishin vepruar për të penguar ndërtimin.

Por përkundër zellit të sotëm që shfaqi Kryeministri për ‘policinë që duam’, sa i përket rastit të ndërtimit në Luginën e Vjosës, qëndron heshtja e tij a pashpjegushme për së paku dy raste të tjera të afërta në kohë.

Rama nuk ka bërë asnjë reagim për atë që ndodhi në Elbsan para disa javësh, ku bandat po përplasen me njëra-tjetrën për kontroll territori, ndërsa Policia e Shtetit ndjehet e pafuqishme përballë tyre.

Video që tregonte incidentin tek Tregu Agro- Ushqimor i Elbasanit e ilustron më së miri këtë gjë. Madje për këtë ngjarje Rama nuk lejoi as gazetarët ta pyesnin gjatë një konference për mediat nga Kryeministria. Ai doli para tyre, foli për çfarë deshi dhe më pas u ndaloi atyre të mos e pyesnin për ngjarjet e aktualitetit, duke nënkuptuar kështu zhvillimet në Elbasan.

Të njëjtën lojë Rama bëri edhe me masakrën e para tre ditëve në Lushnje, ku u vranë dy të rinj dhe u plagosën tre të tjerë, ngjarje kjo e ndodhur pak metra larg komisariatit të qytetit.

Thënë këto, Kryeministri është duke luajtur një lojë të dyfishtë. Ai zgjedh të heshtë përballë ngjarjeve të rënda kriminale në Elbasan dhe Lushnje, ndërsa mburret me ‘policinë që duam’ për rastin e Këlcyrës, i cili është krejt periferik, por jo pa rëndësi, në raport me dy ngjarjet e tjera.

Aq më tepër po të kemi parasysh, se edhe për rastin flagrant të ndërtimit të paligjshëm në Grykën e Këlcyrës, ishte presioni mediatik dhe shoqëria civile, që detyruan vendosjen e autoritetit të shtetit. Nëse ky rast nuk do të bëhej publik, me siguri që paligjshmëria do të sundonte edhe aty.

Edi Rama është më shumë se kurrë nën presionin e opozitës, por dhe ndërkombëtarëve (kujtoni deklaratat e ambasadorit Donald Lu) për çështjen e kriminalitetit dhe bandave që në shumë qytete bëjnë ligjin.

Por Kryeministri ka zgjedhur ta mohojë këtë situatë, duke thënë se gjithçka është fantazi e opozitës. Të njëjtën qasje kishte edhe për fenomenin e kanabizimit të vendit, ndërsa më pas u ‘zbyth’ duke pranuar në heshtje këtë problem.

© LAPSI.al 

Lini një Përgjigje

Adresa juaj email s’do të bëhet publike.

Kthehu