Protesta atipike e një dite më parë në Prishtinë, ku disa aktivistë vendosën 200 kravata te muri rrethues i qeverisë së Kosovës, ka marrë vëmedjen edhe të mediave ndërkombëtare. Prestigjozja franceze, ‘Le Monde’, ka publikuar videon e kësaj proteste, e cila në fakt ironizonte qëndrimin e kryeministrit Ramush Haradinaj.
Ky i fundit, kur u pyet se pse kishte çuar pagën 2950 euro, duke e bërë atë më të lartën në rajon, ai u justifikua duke thënë se “S’mundem gjithqysh me dalë, obligona për një kravatë, një këmishë”. Kjo e shtyu artistin Kushtrim Mehmeti që të nisi një “aksion humanitar” për të mbledhur kravata dhe për t’ia dhuruar kryeministrit. Plot 204 të tilla iu dërguan dje Ramush Haradinajt para zyrës.