Në Kryesinë e Kuvendit u hapën procedurat për ngritjen e Këshillit të Lartë të Prokurorisë, organi që do të zgjedhë më pas Prokurorin e ri të Përgjithshëm.
Në prag të protestës së 27 Janarit, deputetët e opozitës nuk e bojkotuan mbledhjen e Komisionin e Ligjeve. Ata u paraqitën për të denoncuar planin që sipas tyre ka mazhoranca, për të kapur organin e akuzës.
Deputeti Oerd Bylykbashi tha se qëllimi final i të gjitha procedurave është kontrolli i Strukturës së Posaçme Antikorrupsion apo ajo që njihet ndryshe si Prokuroria Speciale.
Sipas Bylykbashit, Arta Marku u zgjodh në detyrë, sepse mazhoranca do të diktojë emërimet e prokurorëve në Këshillin e Lartë të Prokurorisë.
Pas kësaj do të paracaktohet renditjen e kandidatëve për Prokurorë të Përgjithshëm kur ata të votohen në Kuvend.
Sipas Kushtetutës, nëse parlamenti nuk arrin konsensusin e 84 votave për një Prokuror të Përgjithshëm, atëherë zgjidhet automatikisht, emri i parë i renditur në listë.
Por as Prokurori i Përgjithshëm nuk është synimi final i mazhorancës, thonë demokratët.
Me anë të Prokurorit të Përgjithshëm synohet të kontrollohen emërimet në Strukturën e Posaçme Antikorrupsion, ose Prokuroria Speciale që ka kompetencat të hetojë zyrtarët e lartë duke nisur nga presidenti, kryeministri, deputetët, kryetarët e bashive, gjykatësit etj.
Opozita thotë se nuk i druhet drejtësisë. Shqetësimi zyrtar është mbyllja e dosjeve të Saimir Tahirit, Vangjush Dakos, Qazim Sejdinit etj.
Çështja është se Prokuroria Speciale nuk do të hetojë vetëm zyrtarët e lartë në detyrë të dyshuar për korrupsion, por edhe ish kolegët e tyre, që tashmë janë në radhët e opozitës.