Policia deklaroi se është vënë në kërkim të autorit të dyshuar për vrasjen e Marjo Majollari mbrëmjen e së martës në zonën e Kinostudios në Tiranë. Në kërkim është shpallur Kastriot Gjuzi, (i cili ka mbajtur edhe emrin Petrit Gjuzi), vëllai i Ilir Gjuzit, i cili është vrarë në vitin 2000 nga babai i viktimës. Sipas Panoramës që publikon foton e autorit të krimit dyshohet se krimi është kryer për hakmarrje.
Mario Majollari, 28 vjeç, gjeti vdekjen e menjëhershme nga 3 plumba teksa po kthehej në shtëpi. Dyshohet se ai u qëllua me një pistoletë tip “TT”. Sipas të njëjtave burime, 28-vjeçari është qëlluar në kokë dhe në trup dhe për pasojë ka gjetur vdekjen e menjëhershme.
Atentatorët kanë shfrytëzuar momentin kur në zonë nuk kishte shumë lëvizje. Në rrugicën me ndriçim të dobët nuk ka pasur lëvizje në momentin e krimit, kjo edhe për arsye se në atë moment po luheshin ndeshjet e “Champions League” dhe rrugët ishin të boshatisura, pasi banorët ishin nëpër lokale duke parë ndeshjet. Banorët e zonës u shprehën mbrëmë se kanë dëgjuar vetëm të shtënat dhe nuk kanë parë asgjë.