Për Loris Karius duket se nuk mjafton falja që kërkoi në fund të finales të Champions League. Në adresën e 24 vjeçarit në rrjetet sociale kanë ardhur kërcënime me vdekje dhe policia e Mersejsajd ka hapur hetimet.
Gabimet trashanike të portierit duket se kanë irrituar jo pak tifozë që prisnin fitoren e Liverpulit, ndërsa Karius ka kërkuar edhe njëherë falje në profilin e tij në Instagram.
“Nuk kam mbyllur sy pas ndeshjes. Gabimet që bëra më shfaqen pa pushim si film përpara syve. Më vjen pafundësisht keq për shokët, tifozët dhe stafin. E di që me dy gabimet e mia shkatërrova një finale dhe zhgënjeva këdo. Do doja vetëm të ktheja kohën pas, por e di që nuk është e mundur” ka shkruar ai.