Kuvendi i Kosovës shqyrton projektplatformën shtetërore mbi finalizimin e dialogut ndërmjet Republikës së Kosovës dhe Republikës së Serbisë, në kuadër të normalizimit të marrëdhënieve mes dy vendeve.
Praktikisht sot vendoset nëse udhëheqës i këtij dialogu do të jetë presidenti Hashim Thaçi, gjë që është kontestuar ashpër nga opozita. Partitë opozitare nuk pranojnë vazhdimin e dialogut pa një raport vlerësues në lidhje me rezultatet e deritanishme të kësaj nisme, që vazhdon prej thuajse një dekade. Sot LDK-ja është ka deklaruar me anë të një komunikate se nuk do ta përkrahë në Kuvend platformën e Qeverisë për dialogun me Serbinë, që parashikon presidentin Hashim Thaçi në krye të ekipit negociator. LDK-ja thotë se dokumenti i propozuar nga ekzekutivi është joserioz dhe me pretendime jokushtetuese.
“Platforma për dialog, e prezantuar në Kuvendin e Kosovës nga ana e Qeverisë së Kosovës, është dokument i përgatitur dobët, joserioz dhe me pretendime jokushtetuese. Rrjedhimisht, Grupi Parlamentar i LDK-së në Kuvendin e Kosovës nuk do ta votojë platformën në fjalë”, thotë deklarata për media e LDK-së.
Partia e themeluar nga Ibrahim Rugova i bashkohet në këtë mënyrë partive të tjera opozitare si Nisma, Vetëvendosje dhe PSD, që kundërshtojnë Hashim Thaçin si shef të palës kosovare në dialog me Serbinë.