Policia shqiptare përgënjeshtron mediat italiane për 2.5 ton kanabis

Mediat italiane raportuan për kapjen e 2.5 ton kanabis natën e kaluar në brigjet e gadishullit Apenin. Trafikantët kanë mundur të largohen pa lënë gjurmë, por gazetarët e Brindisi Report shkruanin se “janë sekuestruar 2.5 ton drogë që vinte nga zonat e prodhimit të Vlorës, të cilat kontrollohen nga mafia lokale.

Por gjatë orëve të pasdites, policia shqiptare e ka përgënjeshtruar faktin se droga vinte nga Shqipëria. Në një deklaratë për mediat ku tregohet me detaje operacioni i një nate më parë, thuhet se trafikantët i humbën gjurmët në ujërat territoriale të Malit të Zi.

Policia shqiptare thekson faktin se “nuk dihet ende origjina dhe vendi nga ku u nis gomonia drejt Italisë”.

Deklarata e plotë e policisë

Në datë 9 Qershor 2018, rreth orës 16:25, një avion i Guardia di Finanza të Pulias gjatë kontrollit në hapësirën detare, pikasi një mjet lundrues që lëvizte me shpejtësi në ujërat italiane, në largësi rreth 40 milje nga bregu.

Menjëherë në ndjekje janë vënë 2 mjete lundruese të GdF duke e interceptuar mjetin lundrues të llojit gomone, i cili ishte i ngarkuar dhe lëvizte me shpejtësi.

Ndërkohë partnerët italianë kanë njoftuar Policinë Kufitare në Shqipëri. Disa mjete të Policisë Kufitare dhe të Guardia di Finanza në Durrës dhe Vlorë janë vënë në gadishmëri, në pritje të hyrjes së gomones në ujërat territoriale shqiptare.

Por gomonia e ngarkuar, në ndjekje nga GdF ka shtuar shpejtësinë duke hedhur në det ngarkesën.

Më pas ajo i është drejtuar territorit të Malit të Zi, duke u futur në këto ujëra.

Policia malazeze e ka interceptuar gomonen, por pas një ndjekje për rreth 1 orë, ka humbur gjurmët e saj.

Ndërkohë që Guardia di Finanza ka rikuperuar mallin e hedhur në det në ujërat ndërkombëtare në afërsi të ujërave territoriale të Malit të Zi, ku rezultoi 2 ton e 475 kilogramë marijuanë.

Autoritetet policore në 3 shtetet po vijojnë hetimet dhe shkëmbimin e informacionit për zbulimin dhe ndalimin e trafikantëve, por ende nuk ka të dhëna për origjinën e mallit dhe shtetin nga ku mund të jetë nisur gomonia.