Policia pritet të marrë dëshmitë e familjarëve të Xhuljeta Çunit dhe Xhafer Matës, për të hedhur më shumë dritë mbi krimin e dyfishtë, që tronditi të premten kryeqytetin.
Banesa e autorit vazhdon të ruhet nga forcat e policisë. Një patrullë është e stacionuar aty, për të shmangur çdo lloj hakmarrje të familjarëve të vajzës.
Konflikti mes tyre mësohet se kishte nisur 1 muaj më parë, kur e reja vendosi t’i jepte fund lidhjes intime me 31-vjeçarin. Në këtë kohë, Xhuljeta Çuni mësohet se kishte bërë një denoncim në Komisariatin e Policisë Numër 3 për të riun, i cili nuk pranonte ndarjen.
Oficerët e thirrën Matën për ta pyetur dhe më pas i referuan materialet në Prokurori. Por kjo nuk e pengoi 31-vjeçarin të kërkonte me ngulm ribashkimin me Xhuljetën. Të premten paradite, ai e ndoqi nga pas duke e qëlluar me pistoletë. Më pasi ai i dha fund jetës duke u vetëqëlluar në një lulishte raporton Tv Klan.