Neritan Liçaj braktis dëgjesën për Teatrin, Veliaj: Nuk do ta besoni sa ka degjeneruar!

Dëgjesa e organizuar nga Kryetari i Bashkisë, Erion Veliaj me artistë në njërën anë dhe inxhinierë, arkitektë e zjarrfikës, nisi me një deklaratë të lexuar nga aktori Neritan Liçaj në emër të Aleancës për Mbrojtjen e Teatrit. Menjëherë sapo lexoi deklaratën ku kishte si kusht tërheqjen e projektligjit të qeverisë që parashikon tjetërsimin e truallit të teatrit, aktori Neritan Liçaj braktisi dëgjesën.

Por sapo ai është larguar, kryebashkiaku Veliaj tha se ky ishte një moment i inskenuar nga Partia Demokratike. Kryebashkiaku tha se ishte informuar paraprakisht me një mesazh të fotografuar për porositë që i ishin dhënë Neritan Liçajt nga PD dhe këtë do ta publikonte. Veliaj tha se mesazhi do të habiste këdo për degjenerimin që ka pësuar elita e kombit.

“Kjo që unë bëj sot, është zgjedhja ime. Unë e pashë në cel fotografimin në celular, që i thanë “Ik prish mbledhjen” dhe do ta publikoj. Para se të fliste Neritani e kam saktësisht porosinë e partisë dhe do ta botoj. Por e kam zgjedhur vetë të bëj këtë rol. Të moderatorit, edhe pse i di të gjitha. Sot do bëj një dëgjesë qytetare.

Kjo ndarje e artistëve është icik fyese. Dhe kur ta lexoni vetë do thoni ore s’ka mundësi që ka degjeneru në kët pikë elita e kombit” u shpreh Veliaj.

Më poshtë mund të lexoni të plotë deklaratën që Neritan Liçaj lexoi në dëgjesën e organizuar nga Veliaj:

Deklaratë:

Aleanca Qytetare për Mbrojtjen e Teatrit Kombëtar me përgjegjësi të lartë qytetare i bënë me dije cdo qytetari të Republikës kudo ai ndodhet se nuk ka dhe nuk do të ketë asnjë konsensus me askënd sa kohë nuk tërhiqet projekt-ligji i cili grabit tokën publike të Teatrit Kombëtar.

Teatri Kombëtar dhe prona ku ai ngrihet është pasuri publike në aspektin ligjor dhe shpirtëror ndaj sigurojmë cdo qytetar se do e mbrojmë pa asnjë lëshim.

Komuniteti i aktorëve, Shoqërisë Civile dhe qytetarëve të angazhuar që janë bashkuar në qëndresën për mbrojtjen e Teatrit Kombëtar kërkon dialog dhe bisedime konstruktive për rikonstruksionin e godinës aktuale si një vlerë dhe kujtesë historike.

Gjithashtu jemi të hapur për ndërtimin e një godine të re Teatri bashkëkohor në një vend tjetër publik me para publike. Jemi të gatshëm të ulemi dhe të gjejmë formulën se si mund ti vijmë në ndihëm shtetit për mbledhjen e fondeve të kërkuara.

Aleanca Qytetare për Mbrojtjen e Teatrit Kombëtar ju përgjigj pozitivisht thirrjes së parë për bashkëbisedim por hasëm në përdorimin politik dhe manipulimin publik nga ana e qeverisjes vendore dhe qendrore duke gjuajtur nën brez.

Të vetëdijshëm për detyrën e lartë morale që kemi karshi qytetarëve, të qartë se interesi jonë është publikja dhe jo llogaritë e pushteteve, të kthjellët për cfarë rreziku na kanoset, me vetëdije të lartë qytetare dhe të vendosur i bëjmë me dije publikut se nuk do e lejojmë dhe nuk do e japim konsensusin për prishjen e Teatrit Kombëtar dhe tjetërsimit të Pronës Publike.

Bëjmë thirrje për rivendosjen e dialogut. Ka vetëm një rrugë që palët të mund të fillojnë të flasin. Ka vetëm një kusht që ne nuk e negociojmë. Të tërhiqet projek-ligji.

Ne si artistë nuk e njohim Kryetarin e Bashkisë si autoritetin e ligjshëm me të cilin mund të negociojmë për këtë cështje. Sa kohë është iniciuar një projekt-ligj, autoriteti i cili duhet të reflektoj është autoriteti që ka propozuar projekt-ligjin për tjetërsimin e pronës publike.

Aleanca Qytetare për Mbrojtjen e Teatrit Kombëtar i bënë thirrje Kryeministrit të vendit të dalë në shesh e të përballet, ai duhet ta dijë mirë kë ka përballë, ai duhet ta dijë se i vetmi dialog që mund të zhvillohet, do zhvillohet me qeverinë, dhe në kushtet e tërheqjes së projekt-ligjit.

Mos luani me publiken, mos luani me Teatrin Kombëtar sepse ne e kemi ndarë mendjen për rezistencë shëmbullore. Mos sepse do ketë kosto të pakthyeshme për mardhënien mes komunitetit tonë dhe politikës.