Seksioni për Hetimin e Narkotikëve në Drejtorinë Vendore të Policisë Tiranë njoftoi finalizimin e operacionit të koduar “The Weekend Surprise” (Surpriza e fundjavës). Në pranga u vu Fatjon Veseli, 44 vjeç, banues në Tiranë i dënuar më parë për “drejtim automjeti në gjendje të dehur.
Sipas burimeve zyrtare mësohet se shërbimet e policisë ishin në ndjekje të 44-vjeçarit pasi dispononin informacion se ai në bashkëpunim me të tjerë shpërndante “kokainë” sipas dozave te klientët në zonën e “Ish- Bllokut”, “Komunës së Parisit” dhe “Tiranës së Re”.
Veseli është pikasur nga shërbimet e policisë në zonën e Liqenit Artificial dhe gjatë kontrollit fizik të ushtruar, brenda çantës së tij të krahut i është gjetur një qese kokainë me peshë 201 gramë. Në shtëpi iu gjet edhe një motor pa targa që rezultoi i vjedhur.
Policia thotë se janë shpallur në kërkim dhe 2 bashkëpunëtorët e 44-vjeçarit, por për arsye hetimore nuk jepet identiteti. Dosja i është dërguar Prokurorisë së Rrethit Gjyqësor Tiranë me akuzat “Prodhimi dhe shitja e lëndëve narkotike”. ©LAPSI.al