Milan e fillon ringritjen nga sulmi dhe është pikërisht aty ku Elliott do të bëjë goditjen e parë. Në kohën kur duket se kuqezinjtë rrezikojnë të pësojnë largime të rënda (Bonucci, Donnarumma apo Suso), objektivi I fondit amerikan është të fitojë zemrën e tifozëve me një emër që ti bëjë të ëndërrojnë. E pista më e nxehtë e orëve të fundit është Gonzalo Higuain. Pikërisht ai që me dygolëshin e shënuar në San Siro firmosi 0-2 që shkarkoi Montella, duke i hapur dyert Gattusos.
Milan, nëpërmjet drejtorit të ardhshëm të pjesës teknike, Leonardo e disa ndërmjrtësve, ka kontaktuar Juventus e agjentin e Pipita, të vëllain Nicolas, për të nisur tratativën. Në Torino kërkojnë 60 milionë euro për argjentinasin e, pavarësisht se është e qartë se nuk bën më pjesë në projektin e Allegrit pas ardhjes së CR7, nuk janë nën presion, duke qenë se Sarri e dëshiron shumë ta marrë tek Chelsea. Problem për Milan mund të jetë rroga e argjentinasit: 4,5 milionë euro në sezon ka qenë oferta e parë e Leonardos, e ulët në krahasim me 7,5 që merr aktualisht. Por kjo nuk e ka penguar Higuain të japë pëlqimin e tij për hipotezën kuqezi.
E ardhmja mund të jetë Milan, por Chelsea nuk do të heqë dorë lehtë nga sulmuesi i përzgjedhur. Sidoqoftë gjërat mes klubeve janë të lidhura, sepse nëse Higuain transferohet në Londër, Milan do ta ketë më të thjeshtë sulmin për Alvaro Moratën.