Sezoni i ri është në prag, por rregullat e lojës mund të ndryshojnë sërisht përpara startit të kampionatit. Federata Shqiptare e Futbollit në takimin me përfaqësuesit e klubeve të Superiores ka përcaktuar disa ndryshime në krahasim me sezonin e kaluar, por më kryesorja mbetet për tu vendosur të enjten.
Dyndja e lojtarëve të huaj në kampionatin tonë ka bërë që edhe kërkesa e klubeve të jetë për të rritur numrin e lejuar të tyre në fushë. Sekretari i përgjithshëm i FSHF-së, Ilir Shulku, e ka bërë të qartë se institucioni që drejton futbollin po e merr në konsideratë kalimin nga 4 në 5 të huaj njëkohësisht në fushë: “Ka patur një propozim nga 8 klube dhe do të vendoset të enjten. Nga katër lojtarë të huaj në fushë, është propozuar të jenë 5, ndërsa merkato do të mbyllet më 31 gusht”.
Një lajm aspak i mirë për futbollistët vendas, e aq më pak për të rinjtë që kërkojnë minutat e tyre, duke qenë se nga jashtë vijnë gjithnjë e më tepër alternativa, që në disa raste janë edhe ekonomike për klubet. Nuk është rastësi % e ulët e lojtarëve nën 21 vjecarë që luajë në Superiore.
Ndryshimi tjetër i rëndësishëm, por që nuk ka të bëjë me lojën e luajtur por me administrimin e ndeshjes është se Policia, në zbatim të ligjit për mbarëvajtjen e ndeshjeve, nuk do të qëndrojë më në shkallët e stadiumit, por vetëm jashtë tij në gatishmëri. Klubet duhet të kontraktojnë me shoqëri sigurie private për të ruajtur sigurinë në shkallë dhe ambjentet e brendshme.
Klubet duhet të fillojnë ti përgatisin ndeshjet një javë para dhe Skënderbeu-Partizani do të jetë një test për mbarëvajtjen. Shulku insistoi gjithashtu që vetë klubet të punojnë shumë më tepër me tifozeritë e tyre respektive, pasi në fund të çdo incidenti të mundshëm që mund të vijë prej pjesës së tifozerisë, përgjegjësia dhe sanksionet do të rëndojnë mbi vetë ata.