“Koka” e grupit “Bajri” në arrati? Zv.ministri i Brendshëm: Do arrestohet edhe ai

Zv.ministri i Brendshëm, Besfort Lamallari ka zbuluar detaje për operacionin “Oaz”, ku u arrestuan 11 persona si pjesë e një bande kriminale, pjesë e së cilës ishte edhe Safet Bajri, i njohur si i “forti” i Shkodrës.

Lamallari tha se operacioni është tërësisht meritë e autoriteteve shqiptare, konkretisht Policisë dhe Prokurorisë. Ai tha se hetimet për ketë grup kanë nisur që prej 6 muajsh dhe ka pasur bashkëpunim me Holandën për identifikimin e pjesëtarëve të grupit.

“Hetimet nisën prej më shumë se 6 muajsh. Ky operacion është një nisme e veçantë e adoptuar në nëntor të vitit 2017,e cila jo vetëm skedoi grupet kriminale, por ky ishte një rezultat i Task Forcës Speciale. Është vënie e drejtësisë në vend për krime që kanë ndodhur edhe vite më parë. Është operacion 100% i autoriteteve shqiptare. Ka pasur përgjime dhe vëzhgim nga ajri me dron. Bashkëpunimi ka qenë me Holandën për lokalizmin e anëtarëve të grupit kriminal”.

Sa i përket Enver Bajrit, i cilësuar “koka” e grupit, i cili është në kërkim dhe pyetjes nëse ka pasur dekonspirim në operacion, Besfort Lamallari u shpreh se hetimet vijojnë dhe do arrestohet edhe ai.

“Është lëshuar një mandat arresti për Enver Bajrin. Nuk mund ta them nese ndodhet jashtë vendit, por hetimet vijojnë që edhe të shpallurit në kërkim të vihen para drejtësisë. Ky grup kriminal ka arrestime dhe dënime të ashpra”.

Ndërsa për ish portierin e Vllaznisë Armir Grima, zv/ministri tha se ai nuk ishte viktimë, pasi trukonte ndeshjet.

“Sa i përket ish-portierit të Vllaznisë, përderisa Prokuroria ka lëshuar masë arresti nuk mendoj se ka qenë viktimë. Zotëria ka qenë konkretisht pjesë e trukimit të ndeshjeve”, – tha Llamari.