Xherdan Shaqiri startoi për herë të parë si titullar me Liverpoolin në Premierligë dhe ishte deciziv në fitoren 3-0 e të Kuqve ndaj Southampton. Shqiptari i Zvicrës goditi portën në minutën e 10, por devijimi i Wesley Hoedt i mori meritat e golit të parë në anfield Road.
Besimi i dhënë nga tekniku Jurgen Klopp ishte motivi më i madh për fantazistin, që është pafat në minutën e fundit të pjesë së parë, por sërisht deciziv në shënimin e golit. Goditja e dënimit e Shaqirit përplaset në shtyllë dhe i jep mundësinë Mohamed Salah të shënojë golin e parë pas tri ndeshjeve.
Një paralajmërim për Crvena Zvezdën në ndeshjen e ardhshme të Champions, me serbët që vazhdojnë provokimet ndaj sulmuesit që bëri simbolin e shqiponjës pas golit të shënuar Serbisë në Botërorin e Rusisë. Me këtë prezantim Shaqiri tregoi se nuk do të mjaftohet me pankinën, por dëshiron të jetë protagonist në fushë. E me atë që u pa kundër Southampton, kualiteti nuk i mungon…