Skënderbeu merr forcën brenda mureve të shtëpisë dhe dominon një kundërshtar konstant të viteve të fundit, Kukësin, duke harruar humbjen e pësuar në Durrës javën e kaluar. Vendosi në Korçë goli i Gripshit, që lejoi bardhekuqtë të parakalonin kundërshtarin në renditje e të vihen tashmë në ndjekje të Partizanit (16), dy distanca larg.
Ajo që ishte evidente ishte performanca diferencuese e bardhekuqve, përballë një Kukësi që zhbëri në 90 minuta, gjithcka kishte ndërtuar në 6 javët e para të kampionatit. Skuadra e Cungut u vu përfund që në fillim, meritë edhe e Skënderbeut që aneksoi totalisht Reginaldon. Bardhekluqtë ushtruan një invasion të plotë drejt portës së Frashërit: traversa shpëtoi fillimisht Kukësin, por jo për shumë. Blutë ishin të çoroditur aq sa lejojnë një shtatshkurtër si Gripshi ti shënojë me kokë, mes Shametit e Cuculit në minutën e 17.
Një pasivitet i pakuptimtë i verilindorëve, që e lanë veten në mëshirë të fatit. Fat që të paktën në minutën e 32 u tregua bujar. Zguro preku topin me dorë brenda zonës dhe për arbitrin Sokoli është 11 metërsh, që një ekspert si Muzaka e gabon totalisht, duke rrezikuar të përmbysë status-quo e ndeshjes. 53 minuta për të parë një goditje të Kukësit, edhe ajo jashtë kuadratit, por të paktën i dha shtysën bluve të përpiqeshin në fund të rrëmbenin një pikë, që në këtë rast do të ishte e pamerituar, për atë që treguan në fushë.
Fitore e rëndësishme e Skënderbeut, që përligj statistikat me 5 fitore në përballjet e fundit me Kukësin dhe vihet në ndjekje të Partizanit kryesues.