Një gabim mund të kushtojë shumë, shumë më tepër se sa mund të imagjinohet. Ka nga ata që kanë gabuar e janë ringritur si bëri John Terry. Penalltia e gabuar në Moskë e rrëzoi, por kapiteni i Chelsea u kthye katër vjet më pas në Mynih dhe mori cfarë ishte e tij. Por ka edhe nga ata që një trofe të humbur për gabimet e tyre e paguajnë me cmim të shtrenjtë. Michael Carrick, pas finales së Romës ra në depresion, që i hoqi dëshirën për të jetuar Botërorin, ëndërra e tij që fëmijë.
Ish-mesfushori, tani në stafin e Mourinhos në Manchester United, në një intervistë për Times, ka shpjeguar se gjithcka nisi nga një gabim në finalen e 2009, që i dha avantazhin Barcelonës. Një njollë e pashlyeshme që Carrick e mbajti me vete për dy vjet. “Ishte momenti më i keq në karrierë. Përfundova në depresion. Nuk ishte dicka e thjeshtë. Zakonisht pas një gabimi në ndeshje ndihesh keq, ndoshta edhe për më shumë se një ditë, por atë gabim nuk e hiqja dot nga mendja. Një ndenjë e tmerrshme”.
Aq sa për ti shkatërruar atë që për një futbollist është një nga momentet më të bukura në karrierë: Kupa e Botës. Pas një viti nga gabimi i bërë në Champions, mesfushori anglez nuk gjente dot ngushëllim as aty e të dilte nga depresioni. Carrick e quan Botërorin si momentin më të keq në jetë. Si tregon për Times, Carrick i kaloi ditët i ndarë mes dëshirës për realizimin e ëndërrës së fëmijërisë, e dëshirës për tu kthyer në shtëpi tek familja. Kaq mund të kushtojë një gabim, edhe kur Champions e ke fituar një herë. Imagjino cfarë ndodh me ata që nuk do ta kenë më këtë mundësi si portieri gjerman Karius.