Daniel Sturridge ka probleme të mëdha dhe rrezikon një dënim të gjatë. Federata Angleze e Futbollit (FA), ka hapur një hetim mbi sulmuesin e Liverpool për një çështje bastesh dhe shtypi britanik tregon detajet e para mbi atë që duket një ngjarje e rëndë. Sipas asaj që bën të ditur “The Sun”, një i afërm i futbollistit ka vendosur 10 mijë stërlina bast për transferimin e tij tek Inter, ndërsa një tjetër familjar, më parë, kishte vendosur një shifër të konsiderueshme për transferimin e sulmuesit tek West Bromwich, lëvizje që rezultoi e vërtetë.
Faktet i takojnë janarit të këtij viti, përpara se sulmuesi i Liverpool të huazohej tek WBA. Sipas akuzës, pavarësisht se Federata angleze i ndalon kategorikisht anëtarëve të saj të vendosin baste ose t’i japin informacione të afërmve e miqve, futbollisti e ka informuar kushëririn se do të kalonte tek Inter (nuk shpjegohet ndryshe shifra e lartë). Negociata pastaj nuk është konkretizuar.
Basti i kushëririt të Sturridge për transferimin e këtij të fundit te zikaltrit ishte regjistruar zyrtarisht në 17 janar 2018 dhe ka bërë që FA të nis hetimet. Sulmuesi i “Reds” që nuk ka bërë asnjë koment zyrtar, por që i ka garantuar drejtuesve të klubit të tij së i ka respektuar gjithmonë rregullat, ka kohë deri në orën 18:00 të datës 20 nëntor për t’iu përgjigjur akuzave. Nëse këto të fundit do të konfirmohen, Sturridge rrezikon një sanksion ekonomik dhe një pezullim nga aktiviteti futbollistik.