Sa herë që luan Juventus-Inter në kujtesë vjen 1998 e episodi kontrovers që përfshiu arbitrin Ceccarini, Mark Iuliano e Ronaldon. Një cështje që ka mbetur e nxehtë edhe pas 20 vjetësh. Ish-arbitri i ndeshjes u shpreh një ditë më parë, se do të kishte vepruar njësoj edhe me Var. E kjo deklaratë nuk i ka kaluar lehtë ish-trajnerit të Inter në atë kohë, Gigi Simoni, që ka replikuar në programin “Un Calcio Alla Radio” në Radio Crc.
Reagimi i Simoni është i ashpër dhe i vendosur: “I shkreti, nuk është as inteligjent sepse unë në jetën e futbollit kam marrë shumë goditje dhe kam gabuar vendime, por kam patur gjithnjë kurajën të reflektoja dhe të thosha që kam gabuar”. Ish-trajneri madje nuk ngurron të ftojë Ceccarini të tregohet i ndershëm: “Duhet të jemi të sinqertë. Futbolli është një lojë, edhe pse ndonjëherë është e vështirë për t’a vlerësuar. Është dicka që e kanë thënë të gjithë prej shumë vitesh. Në Italia kur flitet për gabime, flitet për atë penallti që iu mohua Inter. Ishte kaq e dukshme. Ky është një faull që zgjat prej 20 vjetësh”.