“Është bukur të shohësh fytyrën që ka marrë stadiumi në Tiranë” – me këto fjalë Theodhor Theodhoridis ka vlerësuar punën e bërë nga Federata Shqiptare e Futbollit. Një vizitë ajo e sekretarit të përgjithshëm të UEFA-s, që vjen në një moment kyç për presidentin e Federatës Shqiptare të Futbollit, Armand Duka, në kërkim të zgjedhjes si anëtar i komitetit të UEFA-s.
Megjithatë, këtë insinuatë, Theodhoridis e anashkalon me elegancë, ashtu si vetë kreu i FSHF: “Nuk është kështu, me Dukën jam njohur shumë përpara se të futesha në UEFA – shpjegoi numri 2 i UEFA-s – kandidatët janë aq shumë sa nuk mund ti lejoj vetes takime apo mbështetje për ta. Për pozicion që kam mundohem të jemë sa më neutral në këto raste”
Edhe Duka ka qendruar në të njëjtën kolonë, duke treguar se kjo vizitë është miqësore dhe kishte si qëllim “inspektimin e punimeve në ambjentet e reja të qendrës së kombëtares dhe zyrave të FSHF-së dhe ndjekjes së zhvillimit të punimeve në Arenën Kombëtare”.
Theodhoridis është shprehur i kënaqur me zhvillimin që po merr futbolli në Shqipëri dhe nuk ka hezituar të japë sërisht mbështetjen e UEFA-s, për investime të reja. Me dy projekte të rëndësishme në zhvillim e sipër dhe investimi në stadiumin e Kukësit, Duka nuk kërkon të ndalet, i mbështetur edhe nga qeveria Europiane e futbollit që është gati të mbështesë me financime projekte të reja në infrasktrukturë…
Takimi me Kryeministrin, i sekretarit të përgjithshëm të UEFA-s, ka patur qëllim për të limuar kontradiktat në lidhje me rimbursimin e TVSH për investimin e bërë, në mënyrë që punimet të kryehen në kohën e duhur dhe cështja të mos detyrohet të marrë zgjidhje përmes institucioneve të drejtësisë.