Pavarësisht se Botërori për klube ishte një dështim, River Plate ka festuar në mënyrë madhështore suksesin e madh në Kupën Libertadores. Në kthimin në atdhe, pas transfertës në Spanjë, ku u luajt finalja e kthimit me Boca Juniors dhe udhëtimit për në Emiratet e Bashkuara Arabe ku u zhvilluar Botërori i klubeve, skuadra në Buenos Aires është pritur nga rreth 60 mijë persona, që kanë mbushur stadiumin Monumental për të festuar triumfin historik në finalen e dyfishtë me rivalët e përjetshëm.
“Ky triumf nuk ka cmim, do të mbetet përgjithnjë në histori”, ka thënë numri 10 i River Gonzalo Martínez mbi finalen që gati paralizoi Argjentinën për një muaj. “Tre vjet më parë, kur fituam Kupën Libertadores në 2015, ishte e vështirë të besoje një ëndërr të bërë realitet dhe i thashë djemve që do bënim më mirë akoma “, deklaroi trajneri Marcelo Gallardo. “Jo vetëm bëmë më mirë, por fituam finalen më të bukur që mund të ëndërronim”, përfundoi ai.
