Massimo Ferrero, presidenti i Sampdoria, ka folur për momentin e skuadrës së tij në Radio1 Sport, pikërisht në vigjilje të ndeshjes me kryesuesit e kampionatit, Juventus. Duket mision i pamundur, duke qenë se bardhezinjtë nuk kanë humbur asnjë ndeshje në kampionat në këtë sezon.
Ndoshta për këtë, ose sepse është gjithnjë i nxituar presidenti dorian, ka bërë një premtim që mund ti rezultojë i sikletshëm nëse ndodh. Është e vërtetë që ndeshja e javës së 19 është e vështirë për Sampdorian që duhet të luajë në Torino me kampionët, por premtimi është premtim dhe duhet mbajtur: “Sfida kundër Juventus? Jam një njeri që kam shumë flokë. I kam mbajtur gjithnjë të gjata, por nëse fitojmë kundër bardhezinjve do ti pres fare. Do ti bëj flokët si Nainggolan”.