Kohë të vështira për sulmuesin Alvaro Morata, që në fakt, që kur është larguar nga Juventus nuk po gjen stabilitet. Këtë herë, si të mos mjaftojë mungesa e golit, sulmit mbi spanjollin i shtohet edhe Gianfranco Zola, zëvendës i Sarri në pankinën e Chelsea. “Duhet të mësohet me presionin, është qendërsulmuesi ynë e nga ai tek Chelsea të gjithë presin shumë. Nuk luan tek Southampton apo Brighton, me gjithë respektin. Edhe nëse do të ndryshonte skuadër, situata do të mbetej e njëjta, nuk mund ti largohesh përgjegjësive”.
Rendimenti i Morata, që në 16 prezenca në Premier League ka shënuar vetëm 5 gola, nga të cilët të fundit dy muaj më parë (shtatë gola në 23 ndeshje sezonale), është sigurisht nën pritshmëritë. Kohët e fundit po flitet për një rikthim të tij në Spanjë: Sevilla e kërkon dhe sipas ‘Mundo Deportivo’ Morata i ka thënë po andaluzianëve.
Por në pritje të zhvillimeve të merkatos, fjalët e ashpra e kanë ndihmuar spanjollin të reagojë: dy gola të Morata në Stamford Bridge në ndeshjen e FA Cup kundër Nottingham Forest. Sulmuesi ka shënuar golin e parë në minutën e 49, ndërsa ka kompletuar misionin 10 minuta më pas me golin e dytë, duke i dhënë kualifikimin londinezëve.