Kosova ka nivelin më të lartë të papunësisë në rajon, duke kaluar edhe Maqedoninë.
Qytetarët e të dy vendeve fajësojnë institucionet shtetërore për këtë dhe shprehen se mendojnë të largohen nga vendi i tyre.
“Në bazë të këtij zhvillimi ekonomik nuk besoj që do të ketë ndonjë rritje të madhe të vendeve të punës në vitin e ardhshëm. Shumica po tentojnë të ikin jashtë, duke mos pasur perspektivë punësimi këtu në Kosovë”, tha qytetari Avni Hajdari.
Një qytetar tjetër fajëson qeverinë për nivelin e ulët të punësimit.
“Vetëm për pushtetarët ka vende të lira pune, për ne punëtorët jo, njerëzit e thjeshtë jo”, tha Ramadan Krasniqi.
Ndonëse në Maqedoni, ndryshe nga Kosova, ka patur një ulje të papunësisë gjatë tremujorit të fundit, pakënaqësia është e madhe edhe atje.
“Katastrofë, shumë vështirë. Ka njerëz që kanë diploma dhe nuk kanë një vend pune”, tha Naip Rrahmani, banor në Maqedoni.
Skënder Reçiça, Ministër i Punës dhe Mirëqënies Sociale në Kosovë është shprehur se po hartohet një plan për zbutjen e papunësisë, por ky problem sipas tij është i thellë pasi është trashëguar në vite.