Goli i shënuar nga Arbër Cyrbja, në portën e titullarit të kombëtares turke ishte statistikor përsa i përket ndeshjes, por motivues për vetë lojtarin dhe Kukësin. Nuk është rastësi deklarata e durrsakut, pas 2-1 në Antalia, ku paralajmëron të gjithë kundërshtarët për titull.
“Treguam se kemi forcë dhe kualitet, dy përbërës që e bëjnë një skuadër të rrezikshme – tha Çyrbja – . Unë dhe e gjithë skuadra besojmë shumë tek titulli dhe me lëvizjet e fundit të merkatos jemi bërë edhe më të fortë, ndaj mendoj se do të shpallemi kampion”.
Miqësorja e parë e vitit për Kukësin solli vetëm më shumë besim në potencialin e skuadrës, pavarasisht humbjes 2-1 kundër Basaksehir. Nuk ishte i lehtë testi kundër kryesuesve të kampionatit turk, por prova e bluve nuk ishte aspak për tu anashkaluar. Stabilitet e madje, në pjesën e dytë, kur skuadra doli më shumë përpara, bindje se kualiteti Bluve nuk i mungon: “Të shënosh një gol në portën e numrit 1 të Turqisë është sigurisht kënaqësi – shpjegoi mesfushori -. Vij nga një moment jo i mirë dhe më motivon shumë ky gol, duke parë edhe mënyrën e realizimit, si në kohët e mira…”.
Në gjysmën e mbetur të sezonit, Kukësi, i përforcuar tashmë edhe me dy emra të rëndësishëm si Rroca e Shkurtaj, do të kërkojë të zhbëjë diferencën që e ndan nga Partizani kryesues, në kërkim të titullit të dytë kampion në histori. 34 pikë në vendin e dytë për Blutë dhe tre pikë për ti rikuperuar Partizanit, pa harruar të shohë prapa ambicjet e Teutës, një distancë larg dhe Skënderbeun e Lacin, që janë gjithashtu në distancë të afërt e ku eksperienca tregon se mund të presësh surpriza.