Jens Stoltenberg, sekretar i përgjithshëm i NATO-s, ka theksuar se ambasadorët e vendeve anëtare të NATO-s mund të nënshkruajnë këtë javë Protokollin për hyrjen e Maqedonisë në NATO.
Në një deklaratë për “Politiko Evropa”, Stoltenberg ka nënvizuar se protokolli do të nënshkruhet sa më shpejt, por për ratifikimin e tij do të duhet më shumë kohë dhe do të varet nga Parlamentet e 29 vendeve anëtare.
“Sapo të nënshkruajmë Protokollin, Maqedonia do të ulet në tryezën tonë, por anëtare e plotë do të jetë vetëm pasi që të ratifikohet marrëveshja nga Parlamentet e 29 vendeve anëtare”, theksoi Stoltenberg.
Për të treguar rreth kohëzgjatjes së anëtarësimit në NATO, Stoltenberg mori për shembull Malin e Zi, të cilit iu desh një vit për ta arritur këtë.
Prej kësaj, lihet të kuptohet se procesi i anëtarësimit të Maqedonisë në NATO do të përfundojë gjatë vitit 2020.