Thomas Strakosha ka bërë një performancë të jashtëzakonshme në derbin me Romën dhe festimi pas ndeshjes ka qenë me shqiponjë. Në fakt është një koincidencë, sepse bëhet fjalë për shqiponjën e Lazios, që është bashkuar me bardhekaltrit për të mbajtur sa më gjatë në memorie këtë rezultat. E nëse Lazio është imponuar 3-0 dhe nuk ka pësuar gol është meritë piëkrisht e portierit të kombëtares së Shqipërisë, që ka marrë vlerësimin e medias italiane.
Tre pritje vendimtare në harkun e 90 minutave, e për më tepër kur rezultati rrezikohej seriozisht, i kanë dhënë Strakoshës notën 6,5. “Luan me kujdes. Në pjesën e dytë mban skuadrën në lojë me pritjet ndaj El Shaaraëy e Florenzi” shkruhet në vlerësimin për numrin 1. Megjithatë, pritja më e bukur e Strakoshës ka qenë në pjesën e parë, kur bllokoi tentativën e Dzekos, duke i kujtuar të gjithëve se kohët e vështira mbaruan…