9 vite të respektuara, të luajtur në të gjitha nivelet me fanellën e
Qarabag, madje edhe në fazën e grupeve të Champions League, duke u përballur me emra të mëdhenj të futbollit botëror si Chelsea e Inter. Për Ansi Agollin, ish-kapitenin e Shqipërisë ka ardhur momenti i largimit nga Azerbaixhani, për të nisur një aventurë të re në Shtetet e Bashkuara të Amerikës në Divizionin e Dytë me New York Cosmos.
Mbrojtësi shqiptar 36-vjeçar, një lider i padiskutueshëm në skuadrën azere ka lënë gjurmë tek Qarabag, që ka dashur ti shprehë mirënjohjen Agollit, ashtu si i takon. Një video-dokumentar me momentet më të bukura të Agollit është postuar nga Qarabag, me të cilët ai ka fituar pesë herë titullin kampion dhe tre herë Superkupën e Azerbajxhanit, ndërsa regjistron 69 prezenca në Kupat e Europës.
Sipas asaj që njofton portali Sportal.az, ditën e shtunë shqiptari do të luajë ndeshjen e fundit me Qarabag, kundër Sabail, ndërsa do të fluturojë më pas drejt New York ku mbrojtësi i majtë do të kryejë vizitat mjekësore, përpara se të hedhë firmën mbi kontratë.
https://www.youtube.com/watch?v=rHnvsg8naPc