Seanca paraprake për ish-ministrin e Brendshëm, Saimir Tahiri, dështoi dje në Gjykatën për Krime të Rënda, ndërsa avokati Makism Haxhia, në një prononcim për mediat la të hapur mundësinë për të kërkuar gjykim të shkurtuar.
“Është shtyrë seanca sepse organi i Prokurorisë, nëpërmjet oficerëve të Policisë Gjyqësore duhet të kishte bërë lajmërimin e të hetuarve dhe nuk e ka bërë. Gjë, që nuk është serioze për një organ të tillë, që është i mobilizuar dhe për më tepër, këtë çështje kaq serioze. Ata janë në kërkim, por ka edhe procedura lajmërimi”, tha Haxhia.
Vetë ish-ministri nuk foli pasi la sallën e gjyqit, duke lënë përfaqësuesin e tij, Maksim Haxhia, t’i përgjigjej interesit të medias. Ky i fundit, pyetjes nëse do të kërkojnë gjykim të shkurtuar, iu përgjigj se nëse zvarritja e procesit do të vazhdojë, ata mund të kërkojnë të procedohet me gjykimin e posaçëm, që në rast fajësie do t’i ulte dënimin Tahirit, ndërsa procesi gjyqësor do të mbyllej brenda 5 seancash.
“Nëse do vazhdojë kështu kalvari i zgjatjeve, do të detyrohemi ta bëjmë kërkesën me gjykim të shkurtuar. Gjithë materiali që ne kemi parë në 57 kapituj, në fashikujt e dosjeve në ngarkim të Tahirit dhe të tjerëve nuk ka asnjë provë që të implikojë Tahirin, që të çojë në ngritjen dhe bazueshmërinë e akuzave, për të cilat ai është sjellë për gjykim. Nuk ka letërporosi, ishte abuzim dhe keqdashje në çështjen ‘Tahiri’ nga analistë të qëllimshëm dhe të pozicionuar. Nuk ka 8, por 2 letërporosi që nuk kanë të bëjnë me akuzat”, përfundoi Maksim Haxhia.
Prokuroria për Krime të Rënda hetoi rreth 16 muaj për Tahirin, ndërsa vendosi ta marrë të pandehur për akuzën e “Trafikimit të lëndëve narkotike” në kuadër të grupit të strukturuar kriminal.
“Pjesëmarrje në grup të strukturuar kriminal”, “Kryerje e veprave penale në kuadër të grupit të strukturuar kriminal” dhe “Korrupsion pasiv i funksionarëve të lartë”. Referuar hetimeve, ato bazohen në përgjigjet e letërporosive të ardhura nga Italia, Mali i Zi dhe Greqia, si dhe disa përgjime. / panorama