• |
ide | kryesore

Shtyhet gjyqi i Klement Balilit, zbulohet arsyeja

Lajme, Të fundit



Gjykata për Krime të Rënda ka vendosur të pranojë kërkesën për gjykim të shkurtuar për Klement Balilin. Ndërsa u fol se procesi për të cilësuarin si Eskobari i Ballkanit do të përmbyllej në vetëm pak seanca, e vërteta është se nuk po ndodh ashtu.

I pandehuri Balili dhe avokati i tij Theodhori Sollaku kanë munguar sërish sot në sallën e gjyqit duke e shtyrë edhe këtë herë pretencën. Avokati i Balilit nuk ka treguar arsyet e mungesës së sotme. Ndërsa gjatë seancës së kaluar mungesën e justifikoi me disa probleme shëndetësore.

Në vendimin e ndërmjetëm gjykata arsyetoi se kërkesa nga i pandehuri është bërë brenda afateve ligjore dhe çështja mund të zgjidhet në gjendjen që janë aktet. Në këto kushte, nëse ish-drejtori i Transporteve shpallet fajtor nga drejtësia, ai përfiton menjëherë ulje të një të tretës së dënimit. Pas këtij vendimi, gjykata ftoi prokurorinë që të përgatisë konkluzionet përfundimtare.
Ish-zyrtari i lartë akuzohet për trafik narkotikësh në kuadër të grupit të strukturuar kriminal, fshehje të pasurisë dhe pastrim të parave. Si prova fajësie u renditen përgjimet telefonike të realizuara nga autoritetet greke në kuadër të një hetimi që po kryhej atje për një organizatë kriminale që trafikonte hashash e kokainë.

Prokurori Nakuci deklaroi më herët se gjatë hetimit nga homologët grekë është identifikuar një person me emrin Keli, që më vonë ka rezultuar se ishte Kelmend Balili. Ky i fundit sipas institucionit të akuzës, ka patur rolin e organizatorit në trafikimin e një sasie prej afro 800 kg hashash nga Shqipëria drejt Greqisë, atje ku edhe u arrestuan dy shtetas shqiptarë. Në kërkesën për gjykim binte në sy fakti, se Balili ishte kallëzuar nga ILDKPI për fshehje pasuria, disa muaj pasi ishte shpallur në kërkim.

Klement Balili jetoi për dy vite në arrati për t’u vetëdorëzuar vetëm disa javë më parë, kur dosja penale e tij u dërgua për gjykim. Ai mohon të jetë përfshirë në veprimtari kriminale dhe këmbëngul për pafajësi.



Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *