Dy agjentë sekretë të Arabisë Saudite janë arrestuar në Stamboll, nën akuzën e spiunazhit për llogari të interesave të Emirateve të Bashkuara Arabe. Në një deklaratë për mediat nga zyra e shtypit e policisë turke, bëhet e ditur se njëri prej të ndaluarëve po hetohet në cilësinë e të dyshuarit për vrasjen e mistershme të gazetarit saudit, Jamal Khashoggi.
Mësohet se njëri prej agjentëve kishte mbërritur në Turqi në tetor të vitit 2018, vetëm pak ditë pasi gazetari Khashoggi të mbetej i vrarë barbarisht në konsullatën e Arabisë Saudite në Stamboll. Deri në përmbyllje të hetimeve, mbrëmjen e djeshme Gjykata turke vendosi për mbajtjen e të dyshuarit në burg, nën akuzat e spiunazhit ndërkombëtar, politik dhe ushtarak.
Khashoggi, një kolumnist i prestigjozes “Washington Post” që njihej për qendrimet e tij kritike ndaj princit të kurorës saudite, Mohammed bin Salman-it, u vra në konsullatën arabe më 2 tetor të 2018-s nga një ekip i operativëve sauditë. Sipas CIA-s dhe shërbimeve inteligjente të vendeve perëndimore, sundimtari saudit ka qenë porositësi i vrasjen së gazetarit.
Ndërkaq, në Arabinë Saudite janë akuzuar si të dyshuar kryesor për urdhërimin e krimit 11 persona të paidentifikuar, mes të cilëve 5 tmund të përballen me dënimin me vdekje.