Romani i fundit erotik i autores britanike E.L. James, “The Mister”, që pason ciklin trilogjik “Fifty Shades of Grey”, është bërë shkas për një reagim të ambasadorit shqiptar në Britani të Madhe, Qirjako Qirko, i cili mban një qendrim kritik ndaj portretizimit dhe steriotipizimit që iu bëhet shqiptarëve në historinë e trilluar të librit. Në narracionin e “The Mister”-it, rol qendror luan një pastruese e varfër me origjinë shqiptare, Alesia Demaci, e cila ka rënë viktimë e veprimtarisë kriminale të një grupi bashkëkombësish në fushën e trafikut të qenieve njerëzore.
Në një intervistë për “The Telegraph”, ambasadori Qirko është shprehur se libri krijon abuzivisht përmes përgjithësimit perceptime negative dhe të paqëna mbi shqiptarët, duke u mveshur tiparet e “kriminelëve primitivë”. “Më vjen keq që ekziston i tillë roman që krijon perceptim negativ për vendin tim. Shqiptarët janë njerëz më të mirë dhe më miqësorë nga se portretizohen në atë roman.”- ka komentuar diplomati Qirko duke shtuar se 120 mijë shqiptarë që jetojnë dhe punojnë në Britani, mund të jenë ndier me të drejtë të indinjuar.