Kryetari i Kuvendit të Republikës së Kosovës, Kadri Veseli, ka thirrur për ditën e sotme një mbledhje mes Presidentit të vendit, Hashim Thaçit, kreut të qeverisë, Ramush Haradinajt dhe anëtarëve të ekipit negociator në procesin e dialogut me Serbinë, Zv.kryeministrit Fatmir Limajt dhe drejtuesit të Partisë Socialdemokrate, Shpend Ahmetit.
Në takimin që pritet të zhvillohet në zyrën e kreut të legjislativit rreth orës 10:00, në fokus të tryezës së diskutimit do të jenë bisedimet e bëra gjatë punimeve të Samitit të Berlinit, lidhur me mundësitë për rivendosjen e dialogut dhe normalizimin e marrëdhënieve dypalëshe me Serbinë.
Samiti i Berlinit mblodhi të hënën liderët e gjashtë vendeve të Ballkanit Perëndimor në një takim informal me Kancelaren gjermane, Angela Merkel dhe Presidentin fracez, Emmanuel Macron. Në një intervistë të dhënë për prestigjozen britanike “Financial Times”, Thaçi e cilësoi deklaratën e përbashkët për shtyp të Merkel dhe Macron, si retorikë boshe që nuk propozon zgjidhje konkrete. Ndërsa, për shefin e ekzekutivit, Samiti i Berlinit forcoi stabilitetin e rajonit përmes hedhjes poshtë të idesë së korrigjimit të kufijve mbi baza etnike.