Zëdhënësi i trupave paqeruajtëse të NATO-s në Kosovë (KFOR-it), Vincenzo Graso, ka reaguar lidhur me aksionin policor të ndërmarrë mëngjesin e sotëm në veri të vendit, ku mbetën të plagosur 4 efektivë.
I pyetur nga agjencia serbe e lajmeve, “Tanjug”, Graso është shprehur se operacioni i Policisë së Kosovës është neutral dhe i shtrirë në të gjithë Kosovën. “Operacioni i Policisë së Kosovës po ndodh me urdhër të Prokurorit të Kosovës dhe nuk po ndodh vetëm në veri si dhe nuk është i drejtuar vetëm kundër serbëve, por ndaj të gjithë atyre që janë të përfshirë në krim dhe korrupsion. Ne jemi duke e përcjellë situatën tani për tani dhe jemi në kontakt me autoritetet e Prishtinës.”
Kujtojmë se si rezultat i aksionit, janë arrestuar mbi 30 zyrtarë policie të kombësisë serbe, të cilët dyshohen si persona të përfshirë në rrjete të krimit të organizuar, si edhe për kundravajtje penale për veprat: “Kontrabandim me Mallra”, “Keqpërdorim i Pozitës Zyrtare”, “Dhënie e Ryshfetit”, “Tregti e Ndaluar” etj.
Aktualisht, në veri të Kosovës ka një prezencë të lartë të forcave policore dhe gjendja vazhdon të jetë e tensionuar. Presidenti serb, Aleksandër Vuçiç, ka mobilizuar ushtrinë në gjendje gatishmërie, ndërkohë që ministri i Jashtëm, Ivica Daçiç, është nisur sot drejt komunës së Zubin Potokut.
https://www.youtube.com/watch?v=AhbPXRF8usE