Komiteti i Politikës së Jashtme i Parlamentit Europian ka paraqitur sot progres-raportin për rajonin e Ballkanit Perëndimor dhe Turqinë, duke rekomanduar hapjen e negociatave të anëtarësimit për dy vendet me statusin e kandidatit, Shqipërinë dhe Maqedoninë e Veriut. Gjatë prezantimit të raportit vjetor të zgjerimit, eurokomisioneri Johanahes Hahn, vlerësoi ecurinë e këtyre dy shteteve në reformat e ndërmarra dhe në zbatimin e ligjit.
Sakaq, Hahn ka përcjellë një mesazh për dy vendet e tjera të rajonit që janë prej kohësh në proces negocimi për anëtarësim me të drejta të plota në Bashkimin Europian, Serbinë dhe Malin e Zi, që u bëri thirrje për rritjen e përpjekjeve në realizimin e rEformave që përshpejtojnë procesin e integrimit të tyre evropian. “Serbia dhe Mali i Zi duhet të rrisin përpjekjet e tyre për të zbatuar reformat në zbatimin ligjor. Sa i takon dialogut mes Kosovës dhe Serbisë të dyja vendet duhet të shmangin çdo veprim që konsiderohet si provokim nga të tjerët. Progresi i bërë i Kosovës është vënë në hije nga taksa, e cila duhet të hiqet.”- u shpreh eurokomisioneri, duke shtuar se Kosova duhet të shfuqizojë taksën prej 100 % ndaj mallrave serbë, në funskion të normalizimit të marrëdhënieve dypalëshe dhe të rivendosjes së dialogut me Serbinë.
Raport i sivjetshëm ishte njëlloj i rëndësishëm edhe për vendin tjetër aspirant, Bosnjë dhe Hercegovinën, që mori zyrtarisht dokumentin “Avis”, që përcakton gatishmërinë e vendit për t’u bërë anëtare potenciale e BE-së.