Rama: Konkluzioni i KE-së është i njëjtë, por jo raporti

Kryeministri Edi Rama, është shprehur se konkluzioni i KE-së edhe këtë vit është i njëjtë me atë të një viti më parë, por raporti nuk është i njëjti. Pavarësisht progresit që sipas Ramës Shqipëria ka bërë, nuk mund të pretendohet se janë tejkaluar të gjitha problemet dhe se është arritur objektivi përfundimtar.

Rama shprehet në Kuvend se objektivi përfundimtar për Shqipërinë është anëtarësimi në BE.

“Konkluzioni është i njëjtë me një vit më parë, por raporti nuk është i njëjti. Në faqet e tij konstatohet se nga viti i shkuar deri më sot, Shqipëria ka bërë progres në rrugën drejt BE. Nga ana tjetër është një pasqyrë ku pa vështërisësi mund të shihen të gjitha shtrembërimit e opozitës rrugore, për të krijuar në sytë e opinionit dhe miqve apo partnerëve që kanë vullnet të dëgjojnë kolegët e ikur në drejtim të paditur, pamjen e një Shqipërie tjetër. Ne nuk pretendojmë se Shqipëria i ka tejkaluar të gjitha problemet dhe ka arritur objektivin fundor. Objektivi lidhet me qëllimin e madh të anëtarësimit në BE dhe me ballafaqimin mes realitetit dhe momentit për anëtarësim. Sot flasim për një fazë të ndërmjetme që duhet çelur me zyrtarizimin e negociatave për të përparuar në të gjitha drejtimet që ka rruga e transformimit të Shqipërisë në një shtet të standardeve të BE”,- tha Rama.