Pas skandalit të publikimit të përgjimeve Dako – Avdylaj nga “Bild” të gjithë njerëzit e mazhorancës janë hedhur në sulm për të zbuluar dhe fajësuar të gjithë ata prokurorë që kanë kaluar nëpër duar dosjen e nxehtë 339 nga e cila kanë ‘rrjedhur” bisedat për blerjen e votave. Lapsi.al i ka bërë një skanim kësaj historie që fillon me vënijen në përgjim të një grupi trafikantësh në Shijak në vitin 2016. Prokurori i parë që nisi të hetonte këtë ishte Anton Martini.
E plotë/ Të gjitha përgjimet Dako-Avdylaj për vjedhjen e zgjedhjeve
Ai bëri rregjistrimin e procedimit penal nr. 339. Por , përgjimet nga trafikantët shkuan tek kriminelë të lidhur me politikën që implikoheshin gjithnjë e më shumë me shitblerjen e zgjedhjeve. Pikërisht kjo nxiti hapjen e një dosjeje të dytë 339/1, ku po hetoheshin disa grupe të tjera kriminale, përfshirë dhe kryebashkiakun e Durrësit. Jemi ende në periudhën kur prokuror i përgjithshëm është Adriatik Llalla dhe në krye të prokurorisë së Krimeve të Rënda Besim Hajdarmataj.
Pra kur zgjedhjet e 25 qershorit 2017 përfunduan me fitoren e vetme të PS dosja kishte filluar të hetohej. Tashmë bisedat e Vangjush Dakos me Avdylajt ishin të regjistruara. Por PD që ende nuk dinte gjë për këtë e pranoi humbjen duke vendosur si rrallëherë një rekord: nuk bëri asnjë ankesë në KQZ.
Disa muaj më pas, pikërisht në nëntor ndodh një zhvillim i papritur. Llalla, që pavarësisht se sot vizatohet si një kundërshtar i partisë në pushtet, u përpoq me mish dhe me shpirt për të mos i futur gjemb në këmbë asaj, urdhëroi largimin e prokurorit Anton Martini nga çështja, duke e transferuar atë në prokurorinë e Shkodrës. Këtu me sa duket filluan të rrjedhin informacionet e para. Pas kësaj lëvizjeje Lulzim Basha doli me deklaratë publike, duke nënvizuar se prokurori Martini po hetonte në Prokurorinë e Krimeve të Rënda përfshirjen e Dakos në blerjen e votave në zgjedhjet e 25 qershorit në bashkëpunim me grupet kriminale dhe Rama ka ndikuar te kryeprokurori për largimin e tij.
Pas Martinit çështja kaloi në duart e prokurores tjetër të krimeve të rënda Elisabeta Imeraj.
Ndërkohë politika hyri fort në lojë. Me votat e vetëm njërës palë socialistët vendosën ta kapin prokurorinë dhe vendosën aty Arta Markun. Ajo menjëherë bëri dy lëvizje. Elisabeta Ymerajn e hoqi qafe nga kjo dosje duke e graduar drejtuese në Prokurorinë e Tiranës. Ajo solli nga Durrësi, ndoshta rastësi nga i njëjti qytet i Dakos dhe Avdylajve, Donika Prelën që e vendosi në krye të krimeve të rënda në vend të Besim Hajdarmatës. Ky i fundit megjithëse u shkarkua nga drejtues filloi të merrej me dosjen 339/1. Por sapo ai filloi të lëvizte në hetimin e kësaj çështjeje i erdhi një transferim i papritur drejt Pogradecit. Që nga ky moment e deri më tani, dy dosjen 339/1 dhe 42 Cd me përgjime që thonë se po zbardhen i kanë marë në dorë dy prokurorët Vladimir Mara dhe Dritan Prençi. Ata u bënë të njëhur dje me urdhërin absurd që i ndalon mediave shqiptare ripublikimin e përgjimeve të botuara më përpara nga Bild në Gjermani.
©Lapsi.al
Kllounët që po hetojnë nxjerrjen e sekretit të dosjes 339
Nje bravo e madhe per berjen publike te atyre qe ne i dime prej kohesh. Hallall ju qofte. Kane bere nje gje qe te thuash e madhe eshte pak. Bravo. Zoti i shperblefte. Bravo. Na kane lehtesu mjaft ne te cileve njerzilleku dhe morali nuk kane vdekur dhe as nuk do na vdesur. Ne emer te se drejtes vetem te se drejtes. Bravo.