“Më parë ishim një skuadër që pësonte tre katër gola për ndeshjem ndërsa me mua jemi krejt ndryshe”. Një performancë skuadre, të paktën në analizën e teknikut Edy Reja, për përfaqësimin e dyfishtë në 180 minutat në Rekjavik dhe Elbasan Arena kundër Islandës dhe Moldavisë. Ndonëse vetëm 3 pikë në dy ndeshje, 73 vjecari i ka dhënë formë një skuadre që e kishte humbur atë, duke krijuar një soliditet difensiv, që italiani e ka theksuar me forcë, edhe pse ajo që e bën optimist dhe që e lejon të zbilancohet në deklaratë është fakti që skuadra tregoi se di të vuajë…
“Në futboll nëse do të kesh rezultate duhet të dish të vuash – tha Reja -. Kjo është një skuadër që tregoi se edhe në vuajtje di të marrë rezultat. Kjo është një skemë që e kisha përgatitur që më parë, duke parë si luanin pjesa më e madhe e kundërshtarëve. Duhet të kemi parasysh dicka, në dy ndeshje nuk na kanë goditur asnjëherë në portë. Me Islandën vetëm goli, gabim i gjithi yni, ndërsa këtë herë nuk lejuam asgjë. Duhet të përmirësohemi nga mesfusha e lart dhe jam i bindur se mund të marrim rezultate…”
Kuqezinjtë kanë luajtur vetëm dy ndeshje me teknikun dhe variantin e tij taktik, por të gjithë duken entuziastë për tu përshtatur sa më mirë me 3-5-2 që ka filluar ti pëlqejë, sidomos në momentin kur vijnë edhe rezultatet. Deri në shtator, kur rifillojnë kualifikueset, ka ende kohë, por gjërat duken premtuese, edhe pse kundërshtari i parë do të jetë Franca