Në Komisionin Zonal të Administrimit Zgjedhor (KZAZ) nr.2 në Shkodër, janë shënuar përplasje fizike mes forcave policore dhe disa ish-deputetëve të Partisë Demokratike. Shkak i tensioneve është bërë shkresa e kryebashkiakes, Voltana Ademi, drejtuar Drejtorisë së Policisë së Qarkut të Shkodrës, ku artikulohej detyrimi i forcave policore për të qenë të pranishme gjatë largimit të materialeve zgjedhore nëpër KZAZ-të, ku ishte parashikuar të mbaheshin votimet për zgjedhjet lokale të 30 qershorit.
Sipas Ademit, kjo procedurë duhet të ndiqet në zbatim të vendimit të presidentit të Republikës, Ilir Meta, për çdekretimin e 30 qershorit si datë të paracaktuar për zhvillimin e zgjedhjeve. Në formulimin e kësaj kërkese, kryebashkiakja i referohej ligjit “Për qeverisjen vendore”.
Bashkitë e drejtuara nga opozita e bashkuar joparlamentare i kanë kërkuar Komisionit Qendror të Zgjedhjeve (KQZ) që të zbatojë dekretin e kreut të shtetit për anulimin e zgjedhjeve, duke liruar ambientet e KZAZ-ve.