Një prej emrave më të mëdhenj të rokut në botë, Dave Mustaine konfirmoi dje publikisht se është diagnostikuar me kancer në fyt.
Në një deklaratë lideri i grupit ikonë të rokut metal Megadeth u shpreh se ka kaluar shumë pengesa në jetë dhe kjo është vetëm një prej tyre.
“Është sigurisht diçka që duhet respektuar dhe duhet përballuar me kokën lart- por unë kam kaluar plot pengesa.”, shkruajti Mustaine, “Po punoj nga afër me doktorët dhe kemi bërë një plan trajtimi i cili ata thonë se ka rezultuar i suksesshëm në 90% të rasteve. Trajtimi ka nisur tashmë.”
Mustaine njoftoi gjithashtu se për shkak të kësaj, Megadeth ka anuluar datat e koncerteve. Ai gjithashtu zbuloi se kolegët e grupit: basisti David Ellefson dhe kitaristi Kiko Loureiro, po punojnë për një album të ri i cili do të jetë vazhdimi i albumit “Dystopia” në 2016-ën.
Dave Mustaine u bë i njohur në mes të viteve ’80, kur pasi u përjashtua nga grupi Metallica, vendosi të krijonte një grup roku që do të ishte si Metallica, por shumë më i fortë në tingull.
Eksperimenti i tij qe një sukses pasi albumi i parë i Megadeth në 1985-ën: “Killing is my business…and the business is good” u prit shumë mirë si nga kritika, ashtu edhe publiku. Megadeth është nominuar 11 herë për çmime Grammy.