Kërkesa e mazhorancës për shkarkimin e presidentit të Republikës, Ilir Meta, është paraqitur në Komisionin Parlamentar të Ligjeve nga kryetari i grupit parlamentar të Partisë Socialiste, Taulant Balla.
Kreu i Komisionit, Ulsi Manja, bëri me dije se kreu i shtetit është njoftuar për kërkesën dhe se nëse dëshiron mund të paraqitet në punimet e komisionit. “Presidenti i Republikës është njoftuar nga Kryetari i Kuvendit. Do ta dëgjojmë Presidentin në Komision nëse dëshiron. Do të ngremë komision hetimor”, deklaroi Manja.
Në mbledhjen e sotme pritet të miratohet kalendari i shqyrtimit të kërkesës, të caktohen relatorët dhe të bëhet prezantimi i kërkesës nga nismëtarët. Më datë 24 qershor është parashikuar vazhdimi i procedurës së shqyrtimit të kërkesës në një seancë diskutimi. Ndërsa, më datë 26 qershor pritet të bëhet përmbyllja e procedurës së shqyrtimit dhe votimi i propozimit, që do të pasohet me përgatitjen dhe përcjelljen e raportit në Kuvend.
Sipas nenit 112 të Rregullores së Kuvendit, kërkesa e paraqitur në Kuvend duhet marrë nën shqyrtim nga Komisioni i Ligjeve, i cili ka të drejtën e propozimit ose jo të krijimit të një Komisioni Hetimor. Meqenëse do të krijohet një Komisioni Hetimor, presidenti do të thirret dhe do të dëgjohet në një seancë të posaçme në lidhje me propozimin e paraqitur.
Në përfundim të hetimit, Komisioni Hetimor duhet t’i paraqesë Kuvendit në mënyrë të arsyetuar shkaqet (nëse ekzistojnë) për shkarkimin e presidentit. Më tej, kërkesa mbërrin për votim në seancë plenare, kur duhet që së paku 94 deputetë të votojnë pro. Në fund, verdikti i takon Gjykatës Kushtetuese, e cila për momentin nuk është funksionale.